وحشتني .........

وحشتني ، وهكلمك ببساطة الطفولة وهبل الشباب ، وسبنا يا بابا من الرسميات ، شوف يا عم طبعا وحشتني موت موت موووووت ، وهموت ، والنبي شكلي هموت شكلنا هنتقابل قريب يا زعامة شوف يا عم بنتك المصيبة اللي أنا طبعا ، بوظت الدنيا وبهدلت نفسي ومرضتها ، وال جاية ألحقني ف اخر لحظة ، مش هبلة دي والنبي ، المهم أنا مثل الجميع يووو هبدأ اتكلم بالرسميات ، لا ياسيدي أنا زي كل الناس مليانة ذنوب وبردو عندي حسنات متخافش ما أنا لازم أشوفك ونتقابل ، وأنت في الجنة أكيد ان شاء الله وأنا هحصلك قريب جدا مهما طال الوقت هروح فين غير هتشحن على مقابرنا ، أنا جيتلك على فكرة وتهت مابين المقابر بس كنت عمالة اندهلك وأقولك جوايا سامعني يا بابا ، أنا حساك حوليا رغم المقبرة ضاعت مني ما المكان هناك شكل بعضو وأنا كنت لوحدي مش احدد ، المهم ادعلي يا والدي بنت منكوبة دايما بالتعب في كل شيء بس الايام دي شادد علي وأنا بقى عرفت من ستو والدتك أنكم بتقدروا تدعوا لنا ، وربنا بيستجيب منكم ، أمك يا كبير مسربة الأسرار أول بأول عندي مفيش في الستات هنا وهناك مش بيتبل في بؤهم فولة ..
بابا .. 🥺 هو أنت زعلان مني ؟ أنا عارفة انك بتعرف اخباري وبتحس بيا ، طب لو زعلان مني حقك علي ، والله غصب عني يا بابا ، سامحني مش هعمل كده تاني ها لسه زعلان ؟ طب حد بوسة وما تزعلش واديدك هبوسها ، ولو عايز رجلك كمان ،المهم عندي تسامحني وتدعي ربنا يسامحني ، أنا والله زعلانة من نفسي بس والله ربنا عارف ان غصب عني ، وبعدين يا بابا متخلنيش اتكلم بقى ان الله حليم ستار 🤭خلاص يا حبيبي مفيناش من زعل صافي لبن ، خلاص علشان اجيلك وأنا فرحانة مقعدش ابرر بقى ، وهجيبلك معايا اللي تطلبو ، ولو آني عارفة انك هناك مكتفي هتطلب ايه من النيلة دي اللي احنا فيها يعني ،، المهم سلم لي على جدي ويتي وعمتو وطنط زينب وعلى حبيب قلبي اللي كان ونسي وسندي بعد ربنا وبعدك عنو ضياء ابويا واخويا وكل حاجة حلوة مشيت ومبقاش كل اللي فيها على رأي الجخ جرف ،، وطبعا هتسألني مين الجخ دا واسع الأسماء دي ، شوف يا بابا خليك في اللي أنت فيه دا واحد صاحبي متعرفوش ، بيقول أشعار بس بقى ماتقوليش لأبدو الطيب وابو تمام والبحتري وعنترة وابو العلاء اللي استغفر الله العظيم يارب. المتعري لاااااا دا حاجة تانية خالص مالص دا يا سيدي شاعر مصري صعيدي بيكتب الشعر العامي زي ما بكلمك كده .. بس كلامو جميل ويمس الجلب ....
بابا أنا نفسي اقعد معاك واحكيلك حاجات كتير جوايا وادخل في حضنك وتضمني وتطبطب علي زي ما كنت وأنا طفلة ، مش وأنا كبيرة يا خويا علشان محصلتش إلا قليل وأنا بس مسافرة وبودعك ، وأنا رجعالك وبتستقبلني .. ماشي ياسيدي شكرا مش زعلانة خلاص ما تتحيلش عليا سامحتك يا زعامة ، وارتحت لما اتكلمنا مع أني عمالة ارغي معاك من الصبح وأنت مش بترد عليا خلاص المرة الجاية تبقى ترد عليا وتقولي حتى كلمة واحدة ، واحدة بس يا روحي ، قولي سامعك ، بس كلمة .. أنا ماشية بقى مش عايز أي خدمة يا قمر ، بوسة ليك على جبينك وايديك وحضن كبيييييييييييييييييييييييييييييييييييييييييييييييييييييييييييير آآآآآد الدنيا دي كلها سلام عليكو يا أحسن واجمل وارجل أب في الدنيا ...و