كأن دفايا من ريحتو.

كأن دفايا من ريحتو

قال سامحيني فسامحتو
وكأنو حته مني سنين طويلة بالغلط طرفت عنيه فدمعت
كأن حاجة فيا دون قصدها جرحت في قلبي فقطعت ،
فقال سامحيني فسامحتو كأنو أنا ،
كأن وجودو كان لازم ، كأن قدرنا كان عازم يجمعنا ،
كأن هوايا أنفاسو كأن دفايا من ريحتو ،
فقال تعبان من الدنيا فريحتو
وقال عارفة :
(وانا جوايا ألف شاكوش بيخبطني على قلبي ويحبطني وخيانتو ليا وجعاني ، والدنيا سامعاني ، لكنه ما سمعني ،
كان همو بس يحكيلي فقولت احكي ، بجملة كل أوجاعي ما أنا واعي وسيبتك ماشي ف خداعي وحبيتك ) فقال : -
لما كنت مش جنبك ضحكت كتير لكني بكيت ،
وأنا عارف ، كان أد إيه الحزن فيكي
باني مدينة وألف بيت ..
وناس رايحة جواكي وناس جايه ،
ومذهولة وسكرانة كأن قيامة في عنيكي ،
وجنة ونار بتشبهني ،
لأني نسيت ما كان بينا وكذبتو ،
وجاع الحب في إيديكي وكان عطشان فعذبتو ،
لكن حنيت ! مكنتش بقدر القاكي أو أتكلم ،
وأنا مكمل في رحلة شوق ومش ليكي ،
ومش عارف تكون ليكي ،
مكنتش حابب أأذيكي ، وأنا حابك لكن كارهك !
عشان عنواني مكتوبلك على روحك وفي عنيكي وعرفاني !
برغم اني في كل الناس بتخفى وشيفاني ،
واطل بكلمة مكبوتة وكام حدوتة عجباني ،
وغنوة حروفها تعباني ولحن بسيط عشان يوصل ،
وبتهرب لكنك بردو عرفاني !!
فاروح حاكي لواحدة في عز صداقتنا ،
تقوم سايباني في السكة بحجة غارت إني حكيت !!
(وأنا بسمع وبتالم لأن الحب جوايا في تفاصيلي منيش شاحتو ، دا انا لكل الورق بحتو ، وللدنيا اللي سكنت فيا وقت ما جيت ، وسيبتو يكمل عشان يرتاح )
قال إن السنين بين غيابنا في الحضور ضاعت هدر ،
وانو عارف أد إيه بيا غدر ، وانو آسف وانو ندمان انو سابني وانو عابني وان الخسارة كانت كبيرة وانو كان شبه الحجر ، وانو جررحني فغصبن عني جررحتو بدون ما أقصد ..
( وأنا بسمع واقول جويا لو تعرف ، لكني خلاص رميت الربع من عمري عشان حبيت بقلب نضيف ، قفلتو سنين ولما لاقاني ففتحتو ، مهو إنسان وكل ما كبرت الغلطة فبتعلم ، ويمكن يوم اكون غلطان فيقدر قلبو يسامحني ، ويذكر إني سامحتو ، يمكن راجع يعوضني بحب كبير ويمكن غير ، لكني نسيت وقتها جروحي وفرحتو ، واللي خسرني زمان اليوم يمكن أنا ربحتو ..
ربحتو صديق ربحتو حبيب ، وأخ شهادتو مجروحة ، أديه جوايا واخد فيا قصر وبيت وشرفة حب مفتوحة .. وانا بحبو حمامة شوق وبترفرف على دوحة ، وقلبي إليه سما زرقا ، حمامة حب سيبالي هوا جناحها في عز الحر بينسم وأنا اتبسم واقول خليها فرحانة مهي روحي وانا روحها ، طلعت بدنيتي بيها وطلعت بيا من نوحها ..تداوي جرحها في روحي ، فينمحى ضنى روحها ،، مهي روحي اللي جوايا وانا اللي في رسمها روحها .