يلا يا حلوة

يلا يا حلوة منك ليها
سيبكم من كتر الحكايات
هنربيهم ونشيبهم
ونحرمهم لف الشارع
والقاعدة اللي على الكافيهات
يلا معايا نكون عصبة
ونسميها شغب ستات
واللي هيعجبو اهلا به
واللي ما يعجبوا راح نرمية ،
من فوق سطح البيت وهنلطم
ونقول أخد الشر ومات .
والبقية تأتي لاحقا

خلي زكية ف حلها شوية
لسه هيطلعلها شنبات
ما الاسكندر لف الدنيا
كانت وقفت ع الستات
لا تعيب على عمة وشال
يعلم ربك بالنيات
خلي زكية تجرب يمكن
تفهم يوم إنها فتكات
يمكن ترجع من أحلامها
وتتعلم منها الحكايات
دي المضروبة تملي في راسها
دي المفطومة على اللكمات
خلي الدنيا شوية تدوسها
هو قانون الدنيا حالات
لازم تتعرض وتجازف
لازم تتطحنها الصدمات
وقالوا زمان روح ما هتتعلم
غير لما الضرب يسيب علامات