الرئيسية
حاولت .. وآه يا عيني على المحاولة
طب حد يمليني صح
أو حتى يفسرلي معنى ، هو ليه زاد الألم
في الحكاية وزاد وجعنا ؟!
دا انا لو كنت بس اقول حسيت بإيه
كان رأي عام هيقوم قيام ،
فوق مني ضرب بالكلام و بالملام
أدام عنيه ، طب احكي إيه وابدأ منين
أبدأ من العين اللي شافت ، ولا أسيب سطرين أنين
وابدأ من القلب الحزين ؟ أبدأ من الليلة الطويلة ؟؟
اللي تحسب بالسنين يوم ما جاني بقلب تاني
ينكر عليا الانتظار ، والحب كان مالي الثواني
واللي نشف ريق لساني لما كنت أنده عليه .
كل دا كان لسه هين كل دا هنقول يعدي
رغم إن فيا الظلم بين ، وبينة شكل المحبة
يمكن يقولو ما تعمليش ما الحبة قبة
ودا مش في طبعي بس ماشي
سيبنا من كل المناهدة بلاها من كل الحواشي
خلينا في الجد اللي قاتل فضفضة كلام مجاشي
هسأل سؤال وعارفة إنو مالوش إجابة
هو في حد انهاردة يحب حد ما بيشوفوش
يعرفو من صوت ف قلبو
جواه حنان هو نفسو ما يعرفوش
حد كان عارف يفعل قسوتو فمهمهوش
ولا مين يوهب سنينو لحد قاسي ما يرحموش
كان يشوف دمعة عيونو عيونو حتى ما دمعوش
كان يشوف شوقو وحنينو محتاجينو مهمهوش
ركنو على رف السنين وهمو بالحب الفشوش
وجاي يقولي بكلمة فضة ، ذهب حنينو وشوقو صدى
جيه مرتين بحروفو مرة وصوتو مرة
واحلف بخضة عليه ما اردش
وكل مرة لهفتي على حبنا تحلف عليا أنا اللي رده
هو يسمع بس من جوايا صوتي وحروفي ليه ،
بتغني فرحة روحي بيه فاشوفو يتردى
يبدأ بتكذيبي لعنيا ، ووداني ويحايل اديا
ما تكتب اني حبيتو بكل جوارح حيا فيا
واشتريتو وهو باعني
ولا تكتب إنو ماحبينش ، أو كسر قلبي وخدعني
وأنا كنت فاكرة حبنا أسطورة
على مر السنين ما بينتهيش ،
عشان جوايا حبي ليه صمم يعيش
طب حتى لو جوايا شيء من عمايلو كان واجعني
من غيابو ف وحدتي والخوف جامعني
ليه لما قرب مني تاني ما حضنش فيا فرحتي
ونسى خوفي فزعتو من دنيا عاشت دنيتي خوفها فزعني
بعد الفراق اللي الزمان شاهد عليه ازاي مدبل وردتي
وقال مفيش بعد انهاردة في الدنيا حاجة تمنعني
عنك وخدني بين ايديه ، طب كان يطمن قلبي ليه
مش يقول أنا مش أنا !! بس يلا نحب عادي
هو في في الدنيا ممكن حد بيفكر كدا
وكل مرة بحس بيه واقول ومالو
يمكن يحن مرة نوبة , حنيتو باينة النوبادي
الاقيه مصر يزيد في بعدو في عز قربو
ويقتل الحب اللي كان من قلبي بادي
طب ليه نقرب لما لسه انت مش انت
خليك مش انت بس سيبني في الجهه دي
ليه تلوي قلبي يحب غيرك ليه بتتجبر وماضي
وأنت عارف لحد فين وصلتنا و مش عادي أبدا
أنا كنت مكتفية ان احبو وحدي من بعد وخلاص
واكتب رسايل افضي فيها ورد الجناين لعيونو دون الناس
واكتبلو عن شوقي اللي ساكت ، وعن حبي اليتيم
ومن سكات أحضن وفايا واكبرو ، ولا يجي يوم ينداس
وللنهاردة أفضل بروحي ولا تتفتقش في يوم جروحي
ولا ينتهيش حتى الممات ليه الحنين ولا ينتهي الاحساس
دا ا كل ذنبي ،، تتصوروا هو دا كان كل ذنبي ؟!!!!
وهو دنبي اني شيلتو عمري كلو ف قلب ماس؟
وأرجع واقولو حرام عليه خلاني اعتب تاني ليه ؟؟
يعني معقول كان هيرضى شيء بيجاورها
تفرض عليه دايما حبيبتو يحب غيرها
ليه اللي على نفسو ما يقبل يقبلوا لغيرو ضميرها
ألف آه خلاني أقولها اتكلمت ،
واما شفها قفلت عيونها استسلمت
ومع الساعات اتاكدت مكانش راجع ليها هي ،
احتار يقدم ايه هدية قام جابها هي
كان عيد ميلاد صديق قديم راجع يخليها الهدية
لكنها بعد الفرح وعقلها اللي فيه سرح ،
خافت ورجعت وف حضني قاعدة متدارية
رجعت تقول وحدتها أجمل والحب فيها اكيد حياة
لحد موجود جنبها أو حتى راح اختار وتاه
كانت مخاطرة شاءهلها يوم رغم العذاب
فاتعلمت معنى الهروب من حد كان بينهم قلوب اتكلمت
حست فحبت ، اتألمت من خوف سكنها
هربت عيونها من غربة شدها المكتوب ،
أو من شروق ماتت شموسه في عزها صبحت غيوب
أو من حبيبها اللي حلفت تعرفو طلع غريب
خلاها تسأل كل حابب عن دوا المحبوب ؟
عن حب قلب لقلب ديب
وارد ف أبيات القصايد ، ومصدر المندوب
عن اللي كان سامع وشايف ، قلب الجوى معطوب
عن براءة في الشعور ، عذبوها عشان تتوب
حروب خفية للجرح والموت والهزيمة
لا غالب فيها يسعد ، ولا يفر المغلوب
شعور مشابه للجحيم والنقمة والتعذيب
انك تحب وتخلص القلب اللي ساكنك
وانت حبك متباع م الحبيب
وقال حاولت ..واه يا عيني على المحاولة
شكرا يا سيدي على المحاولة
اللي خدنا بالعذاب والغموض سكة مقاولة
ومشيت معاه البنت لحدود النهاية، خلاها جولة
ولحظة ما قال خلصت مشاعر من هنا
وقال هناك أنا اللي حبك خليكي جنبي مآتين سنة
ونسي الصباح والكلام الوردي والجمل الملاح
ورجع يقول أنا مش أنا ،
وقفت هنا احلامها ، والخيال اللي كان ساكن جملها
عادت بالذاكرة للسنين القاهرة
عرفت كدا من سكات أن اللي جيه لابس قناع
كان جاي يسيبها باقتناع واهو راح بعيد بلا معذرة
كان جاي ياخد م السنين اد اللي ضاع
لجل بس يقول حاولت ، وإيدو مرفوعة الوداع
من يوم ما قرب قالهالها مليارين مرة
ما سكتش مرة وقلبو ذاع قال الوداع
كان حد لكسرتها الجديدة جيه لما جاع ..
