ما تزعلوش .......

يابابا : قالي احضنيني ..
وخديني خليني احس بدفء روحك ،
والمسيني ..
يا بابا خدني من إيديا ،
وبإيدو غمضلي عنية
وقرب شفايفو من شفايفي ،
وسمعت أنفاسو فلمسني احساسو
كان لسه بيقرب فلقتني بتهرب
خوفت الف جناحي وابوسو ف عنيه
خوفت من إيدي تروحلو تستحلى إيديه
وجريت كأني ..
دمعة على خد الهوا ،
وبرغم إني ..
عاشقاه كأني مريض بيستنى الدوا
عارفة لكني ..
كان رعبي أكبر م الفراق
خدني يا بابا ،
لقتني ماشية لسه فيه
مشتاقة ليه
مشتاقة أكتر م الغلابة
لرغيف جوى
يسدوا جوع الحب به
كان عندو جوع ألفين سنة
لحب ما شبعتوش أنا
ولا عمر غيرو يشعلو
كل السنين اتأجلوا
كل السنين اشتقتلو
ولما قالي تعالي كنت بحنلو
لولا حيائي وحاجات كتير
قعدت ما بينا تبصلي
يا بابا ليه الحب مش سهل ولطيف ؟؟
ليه بيضحك ومن ورا اكتفنا يحذر
بفراق مخيف ؟؟
يا بابا قولي : ليه الحب يستولي علينا
وعامل نفسو فينا ضيف ..
ليه كل حاجة واقفة بينا حتى الظروف
ليه الاحلام ما تبقلناش حقيقة
وليه الحلم يتفسر بطريقة واحدة
عقيمة من رحم ما يحققوش
مع أن فيه مليون طريقة
لسه هناك ما اتجربوش
يا بابا ، قولو ..
ولا أقولك بلاش تقولو
ما تزعلوش ...