أرجل مني ......

من وحي كلامنا يجي إلهامنا
كنت بكلم صاحبتي ،
وقعت فيا كلمتي ، أخذتها
كتبتها عزفتني قومت عزفتها
ومشيت كمان على لحنها
طلعت كدا وكدا شكلها :-


أنا قلبي طلع أرجل مني
بيمشي كلامو عليا
لو قالي حني بيفتني
وتملي بيأثر فيا
لو حب مرة بيزعجني
ونبضه بيزن عليا
عايش دايما وسالبني
قراري ليه مش بإديا؟!
ممكن جدا يحرقني
لو وقفت ضدو عنيه
دا كاويني ومعذبني
ما يبطل عند شوية
ساعة عنيد ومغلبي
وسعات ياخدني بحنية
ما يهمهوش إيه يتعبني
لنفسو عايش مش ليا
لو روحت منو بيجبني
ويقولي عيب إنتي وفية
وأقولو ع اللي يريحني
يقول : أنا اولى ياغبية
وكتير بيمشي وبيسبني
ما العند فيه طبع وغية
من يوم ما جيت وأنت ساكني
طب ليه توريني أسية؟!
عليا تيجي وبتخوني
وعليك يهون حزن عنيا
وبتنسى انك شيء مني
لو ضعت هاخدك في إيديا
ياما عشت جوايا ف حضني
وبغيري نبضك مش بيا
وعايشلك لكن إنت فايتني
وهاين عهدي وعهدك ليا
وطلعت أرجل ليه مني ؟!
وأنا بيك ، معاك متربية..