عشان أعيش ........

فوق شفايف الورد كان ليا حياة
مش هتصدم ولا هتهدم
ولا عمري هقول الآه ..
لما حبيت منو لونو
بسمتو وضحكة عيونو
لما كان عشقي شذاه
لما قلت لدمعو لا
وشربت من مية نداه
وابتسامتي ف الغياب كانت لقاه
وأما الحروف اتبعترت
لملمتها ف القلب خليتها معاه
ومشيت ورا الأنسام التايهة منو
كان فايتها خطوتي مشيت وراه
واما قال انتي حبيبتي
واما طار بيا ف سماه
واما نتف من جناحي أغلى ريش
وقال بحبك مش هتقعي ماتخفيش
وسيبتله نفسي وهوايا يسندو فيا هواه
عشان كده رفضت إني أتصدم أو اتهدم
ما أنا صحيح لو هتصدم أكيد هموت
ولو كياني هيتهدم هيبني ويعلي السكوت
فيا المداين والبيوت ، واعيش كأني من عدم
عشان كده أنا هتعمي وأفضل لوردي مصدقة
واعذر الشوك لما يجرح ، وافضل أداوي
وافضل أطيب وافضل أطبطب
على كل موضع فيه ألم
لحد ما انسى . عشان أعيش قبل اما اموت ..
مش عايزة أكبر ، ولا عايزة ادمع نفس الدموع
مش عايزة من كل الحقيقة ، ذرة تعلمني الخضوع
مش عايزة أسمع عن قلبي اللي داب كلمة واحدة
ولا كلمة جامدة ، ولا حتى جاحدة
مش عايزة أفضل في العذاب
ولا عايزة ف النور أي ضلمة
هكذب عليا والكذب في الإصلاح حلال
هحب ف الورد اتزانه وهنسى شوك الإختلال
هدور على كلمة حلوة تتعلق فيها ابتسامتي
لو احتلت فيا العيون هقول يعيش الاحتلال
مش هصدق إن ضاع مني السنين
كانوا على باب الأمل مستنين
مش هصدق أي حاجة توجعني ،
ولا اختراع ولا ابتداع ولا هبرر أي حاجة
وخلي الدنيا تسمعني ..
هكذب وأقول كان طبيعي الورد يجرح
وأشواك الورد تخدعني ..
عشان أعيش قبل أما اموت ،
وقلبي يتنفس رضاه
ولا أتصدم ولا اتهدم ، وهصدق كل كذبة
وكل وهم ! وكل حب بيظلموه ،
أو اتظلم ماقالش آه ..